美國星期一批准對台灣出售價值22億嘅軍備，當中包括108架M1A2阿布拉姆斯主戰坦克、250枚刺針導彈，仲有重機槍、通用機槍等，恐會加劇中美緊張關係。美國近年多次對台售武，背後嘅歷史轇轕，居然係同中美建交及美國國會通過《台灣關係法》有關？

其實响建交之前，中美兩國於1978年就關係正常化談判展開協商，美國哈佛大學榮休教授傅高義所寫嘅《鄧小平時代》提到，中美一開始就意識到，台灣係當中棘手議題。經過幾次會談之後，美方表明會繼續對台售武，被中方堅決反對，原因係《上海公報》中，美國同意支持「一個中國」原則，而對台售武並不符合《上海公報》嘅精神。美國時任副國務卿話，美國賣畀台灣嘅武器，僅僅係具有防禦性質。去到10月，鄧小平表示，反對美國對台售武嘅立場無動搖，但係唔反對美台繼續保持經濟同文化來往。

同年底，雙方官員交談時，中方代表提到美方已同意全面停止對台售武，美方官員好驚訝，因為佢哋認為，美方雖然答應鄧小平嘅要求，响1979年1月兩國關係正常化後唔向台灣售武，但僅僅只係嗰一年，之後打算還原基本步，恢復售武。美方意識到雙方對呢嘅問題有唔同理解，於是叫駐華聯絡處主任伍德科克提出緊急請求，要求同鄧小平會面。會上美方提出基於美國嘅政治需要，會繼續對台售武。《鄧小平時代》記載，當時鄧小平發火十分鐘，怒斥「為何又提出售武問題？」並再次表示反對。

經過一輪商討之後，伍德科克表示，中美關係正常化之後，美國人慢慢會接受台灣係中國一部分，認為當前頭等大事係完成關係正常化，鄧小平答「好」，最終兩國於1978年12月16日發表聯合公報，決定於1979年1月1日起建立外交關係。

不過令中國意想不到嘅係，美國國會於1979年4月，即係同中國關係正常化之後幾個月，通過咗《台灣關係法》，將對台貿易、交往等領域作出調整，包括對台出售防禦武器。美國嘅《台灣關係法》被指違背同中國談判嘅精神，甚至被認為係違背《上海公報》精神。

後嚟中美响1982年提出《八一七公報》，限制美國對台售武，提到美國「願意逐步減少對台灣武器嘅出售」。連同1972年嘅《上海公報》以及1979年嘅《中美建交公報》，三份公報成為中美關係嘅基礎文件。2015年美國奧巴馬政府對台售武，中國外交部就重申美國咁做係嚴重違反中美三個聯合公報，特別係《八一七公報》原則。講到呢度，唔知大家對呢段歷史有咩睇法呢？

原圖嚟自網絡。